Tripura : Cabinet-in post 1,267 hnawh khat tura hna lak pawm

Tripura chief minister Manik Saha kaihhruai, Tripura state cabinet chuan Ningani khan department hrang hranga post 1,267 hnawhkhahna tur leh assistant professor post 200 siam tura rawtna a pawm tih transport minister leh cabinet thupuangtu Sushanta Chowdhury chuan a sawi.

Meeting neih zawha Civil Secretariat-a thuthar lakhawmtute a kawmnaah, Chowdhury chuan cabinet-in Printing and Stationery Department hnuaia Group C technical post 27 hnawh khahna tura rawtna a pawm thu a sawi. Hna lak hi Joint Recruitment Board of Tripura (JRBT)-in a buaipui dawn a ni. Cabinet chuan Health and Family Welfare Department hnuaia Group C Lower Division Clerk post 219 siam leh hnawhkhahna tura rawtna a pawm bawk. Heng hna hrang hrangah hian JRBT chuan Recruitment test an buatsaih dawn bawk a ni.

Home Department hnuaiah mipa leh hmeichhe constable post ruak 916 chu direct recruitment hmanga hnawhkhah a nih tur thu Chowdhury chuan a sawi. Cabinet chuan railway police station thar palia category hrang hranga post 105 siam a remti bawk.

Railway police station tharte hi Bishramganja, Udaipur, Belonia leh Sabroom-ahte din a ni dawn tih Chowdhury chuan sawiin, post siam tharah hian station hrang hranga thawktute lak an ni ang. Tribal Welfare Department hnuaiah lower division clerk post 15 chu fixed-pay basis-a hnawhkhah a ni dawn a, JRBT-in exam a buatsaih ang. Higher Education Department-ah cabinet chuan assistant professor post 200 siam tura rawtna a pawm tih Minister chuan a sawi bawk.