Sikkim : Sorkar leh BHASHINI-in MoU ziak

Sikkim sorkar chuan August 19, Nilaini khan Ministry of Electronics and Information Technology hnuaia Digital India BHASHINI Division nen Memorandum of Understanding (MoU) an ziak a, he inremna hnuaiah hian sorkar service-te tualchhung ṭawng hmanga awlsam zawka siam a nih theihna turin hma lak a ni ang.

Inremna thuthlung hi Department of Information Technology leh Digital India BHASHINI Division-te ṭangkawp buatsaih, Gangtok-a ni khat awh BHASHINI Rajyam State Engagement Workshop neihah ziah a ni. Workshop-ah hian sorkar official-te leh ṭawng lama mithiamte kalkhawmin, India language technology hman dan tur, inrelbawlna, mipui service, research leh thil thar siam chhuah dan zirchian a ni. Hawnna inkhawmah hian IT department chairman Navraj Gurung, secretary Bimal Rai, principal director T Samdup, Digital India BHASHINI Division CEO Amitabh Nag leh, director Prem Vijay Basnet-te an tel.

Gurung chuan he thawh dunna hnuaiah hian state chu ramchhunga digital transformation-ah a tel ve thei dawn tih sawiin, hemi rual hian linguistic identity a humhim thei dawn a ni, a ti. Mipuite tan tualchhung ṭawng hmanga inbiakpawhna siamsak a pawimawh a, a bikin thingtlang leh hmun hla leh tlawhpawh harsaa ṭawng hmanga inthliarna avangin public service-ah harsatna a thleng ṭhin tih a sawi. Health, zirna, loneih, thingtlang hmasawnna leh khawpui hmasawnna bakah direct citizen engagement hmangin department-te chu he hmalaknaah hian tel turin a chah a, mipuite hriatthiam theih ṭawng hmanga thu pawimawh thehdarh a nih theihna tura hma la turin a fuih bawk.