Meghalaya : Tourism department-in state tlawh tute fimkhur turin chah

Meghalaya Tourism Department chuan state khawpui, Shillong-a buaina thleng mek chungchangah khualzinte leh state tlawhtute chu fimkhur tur leh, official-te thuchhuah zawm turin a chah. Department chuan Shillong-a thil thleng mek chu a thlithlai reng thu leh, khualzinte nghawng thei thil eng pawh a vil reng tih a tarlang. State tlawhtute chu fimkhur tur leh, official kaihhruaina zawm turin a hriattir a ni.

He thuchhuah hi Shillong-a Khasi Students' Union (KSU)-in black-flag bike rally an neihnaa buaina a chhuah aṭanga ni khat hnuah tihchhuah a ni a, he thil thleng vang hian pawl hruaitu senior pathum man niin, an zingah hian president Raymond Kharjana pawh a tel. Police-te chuan Kharjana bakah KSU vice president Pynkmenlang Sanmiet leh general secretary, Reuben Najiar-te chu Nilaini tlai khan man an ni a, Bharatiya Nyaya Sanhita hnuaiah thubuai siamsak an ni tih thuchhuah an siam.

He buaina chhuakah hian lirthei 31 vel tihchhiat a ni a, mi eng emaw zatin hliam an tuar nia sawi a ni. Sorkar lirthei pakhat hal niin, state pawn lam lirtheite pawhin beih an tawk bawk. Rally hi KSU-in tun thla tir lama chief minister Conrad K. Sangma hnena charter of demands point nga awmna an theh luh hnua buatsaih a ni. An thil phut zingah hian Meghalaya Residents Safety and Security Act leh Inner Line Permit system kalpui, sorkar hnathawk lak dan siamṭhat, NEIGRIHMS-a hnathawk lak chungchanga thil felhlel awmte laka hmalak pawh a tel.

KSU chuan buaina chhuak chu pawi an tih thu leh, pawikhawihtu tu tih hriat lohten rally-ah hian pawl hmingchhiatna turin beihpui an thlak tih an sawi. Mahse police-te chuan he thil thleng hian rally buatsaih phalna pek dan bawhchhiat a nih thu sawiin, khauh taka hma lak a nih tur thu an tarlang. Police-te chuan Nilaini zan khan Jaiaw-a KSU office an dap bawk a ni.