Meghalaya : West Bengal-a kangmei vanga thi mi 5 chhungte zangnadawmna pe dawn

Meghalaya chief minister Conrad K. Sangma chuan Meghalaya khua leh tui, West Bengal-a Birbhum district-a Tarapith Temple bulhnai hotel-a kangmei chhuaka thi mi panga chhungte hnenah zangnadawmna, Rs nuai 2 ṭheuh pek an ni dawn tih a puang. Heng mi panga nunna chante hi South Garo Hills-a cheng an ni. Kangmei chhuakah hian Meghalaya state mi parukte pawhin hliam an tuar a, state sorkarin an inenkawlna senso a tumsak dawn tih CM chuan a sawi bawk.

Sangma chuan August 17 khan kangmei chhuak avanga thihna thleng chu pawi a tih thu leh, state sorkar chu West Bengal thuneitute nen chhungkua a nghawngte leh hliam tuarte puihbawm kawngah thawh hona ṭha nei turin inbiakna an nei tawh tih a sawi.

Kangmei chhuak hi Birbhum-a Tarapith Temple bul hotel-a thleng a ni a, electric kal sual vang a nih rin a ni. Birbhum police superintendent Vidit Raj Bhundesh chuan, police leh fire brigade-te'n a hmun an thlen hian pawn lam aṭangin kangmei leh meikhu hmuh tur a awm lo tih a sawi. Police-te chuan hotel enkawltute lakah FIR an theh lut a, thu zawh fiah turin custody-ah hruai an ni. Forensic team-te chuan kangmei chhuah chhan an chhui chiang mek a ni.