Manipur : Ni 2 chhung nawrh huaihawtin nunphung tibuai

Manipur-a zirlai pawlin chhiarpui neih hmaa National Register of Citizens (NRC) kalpui tura an phut avanga ni hnih chhung nawrh an huaihawt chuan district pangaah nunphung a tibuai nasa hle. Market leh zirna inte khar a nih bakah, lirtheite pawh khaw chhunga tlan khap a ni.

He lungawi lohna lantirna hi Campaign for Just and Free Delimitation (JFD) chuan Thawhlehni, August 18 zanlai aṭanga a huaihawt a ni a, nawrh huaihawt hian hill district bakah Churachandpur-ahte harsatna a thlen lo thung. Imphal East, Imphal West, Thoubal, Kakching leh Bisnupur-ah sorkar office hnathawk hmuh tur an awm mang loa, mimal lirthei tlan chhuak an awm mang lo bawk. Zirna inte khar chhunzawm niin, vantlang veivahna lirtheite pawh kawtthlerah hmuh tur a awm lo.

Lungawi lohna lantirnaah hian valley district hmun hrang hrangah mau leh lung hmangin kawng dan a ni. Imphal East district-a Kongba bazaar-a chawhmeh zuarte pawh an sumdawnna chawl lailawk tura haw tir an ni. Thoubal-a Athokpam-a lungawi lohna lantirtute chuan kawngah motor kete halin, 'NO NRC, No Census' tih thuziakte an tar bawk. Census 2027 self-enumeration hi August 17 aṭanga kalpui ṭan tura ruahman a ni a, house-listing chu September 1-30 chhunga neih tura ruahman a ni bawk.

Zirlaite chuan chhiarpui neih hmaa NRC kalpui phutin Pathianni, August 16 khan Imphal-a Director of Census Operations pawnah lungawi lohna an lantir a, pungkhawm hnawh darhna atan police-te chuan fire tear gas shell an hmang a ni. Imphal East leh Imphal West district-ah pawh August 16 khan torch rally neih niin, state-a dan loa pem lutte hriat chhuah hmasak an phut a ni.