Meghalaya : Kawng thuam ṭhatna tur Rs vbc 140 tlangzarh

Meghalaya sorkar chuan East Khasi Hills leh South West Khasi Hills inkalpawhna kawng pawimawh, km 40-a thui Weiloi-Mawkyrwat-Rangthong kawng thuam ṭhatna tur Rs vbc 140 a tlangzarh. Chief minister Conrad K. Sangma chuan Thawhṭanni khan Mawkyrwat-ah project lungphum a phum a ni. Project-ah hian single-lane awmsa chu intermediate-land-ah tihchangtlun a ni ang.

Project hian hmun hnih- Laitmawsiang-Mawthawpdah kawng km 22.56-a thui leh, Rangthong kaltlanga Jakrem-Ranikor kawng km 17.44-a thui a huam a ni. He kawng hi Weiloi khua aṭanga inṭan a ni a, Mawphlang-Balat kawng km 23 bulhnaia awm niin, Rangthong-ah a tawp a ni. CM Sangma chuan helai kawng hi Mawkyrwat leh South West Khasi Hills-a chengte'n hun rei tak siamṭhat an phut tawh tih a sawi.

Project senso Rs vbc 140 chu sorkar laipui aṭang emaw scheme dang ni loin state sum a nih thu a sawi. Project chu hunrei lote chhunga thawh ṭan a ni dawn tih sawiin, kawng km 40 chu thla 12 aṭanga 15 chhunga zawh fel tum a ni, a ti. Sangma chuan project pumpui chu nakkum December-ah peih fel tum a nih thu a sawi bawk. Kawng siamṭhat hian East Khasi Hills-a Weiloi, Mawteibah, Laitmawsiang leh Pongkung bakah khaw hrang hrangte chu South West Khasi Hills-a Umjarain, Jakrem, Mawkyrwat, Nonglang, Mawmerang leh Rangthong-te nen a thlunzawm dawn a ni.