Nagaland : Zirlai pawlin national song sak khap an thlawp

Nagaland-a zirlai pawlte chuan August 15-a state-a Independence Day vawi 80-na lawmnaah, Naga Kristiante rinna kalh zawnga ram hmangaihna lantirnaa tel lo tura ngenna chu hlawhtling takin an zawm tih an sawi. Naga Students' Federation (NSF) president, Mteisuding Heraang chuan state khawpui Kohima-ah volunteer-te an tirh thu sawiin, national song, 'Vande Mataram' version siamṭhat saknaah zirlaite an tel leh tel loh endik a ni tih a sawi.

NSF chuan sorkar laipuiin 'Vande Mataram' sak ngei ngei tura thutlukna a siam chu an thlawp loh thu leh, he hla hi Hindu sakhuana nen inzawmna a nei tih an tarlang. Sorkar laipui chuan kumin January 28 khan state official leh cultural event-ah 'Vande Mataram' sak ngei ngeina tur thupek a tichhuak a ni. He hla tir lamah hian India ram chawimawina lam awm mah se, a tawp lamah Hindu pathian Durga, Lakshmi leh Vani-te dahtel a ni.

Hemi chungchangah hian Heraang leh a kaihhruai zirlai pawlte chuan, Independence Day lawmnaa he hla version puma sak chu an thlawp loh thu a sawi a ni. NSF chuan hnam chhinchhiahna leh hlate chu a dodal lo tih sawiin, 'Vande Mataram' version thar official function-a sak tura tih chu an duh loh thu an sawi. Independence Day chu Kohima-a Secretariat Plaza-ah lawm a ni a, 'Vande Mataram' sak a nih chhungin mipui tam zawk chu an ding chhuak loa, national anthem 'Jana Gana Mana' zahna erawh an lantir.