Assam : Guru Randhawa leh Sikh Aid Foundation thawkdun

Punjab singer-songwriter Guru Randhawa chuan Assam-a tuilian tuarte chhawmdawlna atan pen chhuakin, Sikh Aid Foundation nen an thawhdunnain Upper Assam hmun ṭhenkhatah chenna in 35 an sa dawn. Heng chenna inte hi Sivasagar, Jorhat leh Nepali Khuti-a tuilian avanga harsatna tawk chhungkuate tan sak a ni dawn a, he hmalaknaah hian Randhawa chuan Rs nuai 7 a thawh a ni.

He hmalakna hi hunrei tak daih tur chhawmdawlna niin, tuilen hlauhthawnawmna hmuna cheng chhungkuate himna tura ruahman a ni. Randhawa hian tunhnai khan Assam-a tuilian tuarte tan Hello Life Foundation kaltlangin Rs nuai 5 a lo pe tawh bawk. He ṭanpuina sum hi digital creator, Dimpu Baruah nen an thawhdunna hmanga pek a ni a; ei leh in, thawmhnaw, damdawi leh thil dang mamawh leina atan hman a ni bawk.

Assam-a tuilian tuarte tana chhawmdawlna petute zingah hian Bollywood actor Salman Khan leh Randeep Hooda-te bakah, digital creator Fukra Insaan leh Triggered Insaan-te pawh an tel a ni. Randhawa hi khuarel chhiatna tawkte tan puihbawmna a lo pe tawh ṭhin a, Punjab tuilianah chenna in sak ṭhat, ranvulh chaw eitur leh loneitute tan thlai chite a lo pe tawh a, Covid hrilen lai pawh khan PM-CARES Fund-ah Rs nuai 20 a lo thawh bawk a ni.