Manipur : Assam ramri bula bungraw phur lirthei tangte ngaihven turin ngen

Manipur-a Transporters and Drivers Council (TDC) chuan state chief minister, Yumnam Khemchand Singh chu Assam ramri bula bungraw phur lirthei ni 20 chuang tang tawhte an tlan chhuah theihna atana hmala turin an ngen. Lirthei bungraw phur 2,000 vel, truck leh fuel phurte pawh telin, Assam-a Jiribam leh Pailapul inkar km 20 velah an tangkhang mek a, lirthei tang hi an pun belh zel nia report a ni.

Council chuan bungraw phurhna kawng pawimawhah hian hun rei tak harsatna an tawk tawh tih sawiin, kawng chhia leh venhimna lama harsatna a awm avangin nitin mamawh tlakchham bakah, state pumah thil man a tisang lehzual thei tih an tarlang. Jiribam-Imphal kawng hi Manipur tan supply corridor pawimawh tak a ni a, lirtheite hi ni li aṭanga ni ruk vel an thang ṭhin a, leimin a thlenin karkhat aia rei an thang ṭhin niin an sawi.

Manipur-a Ukhrul district-a Litan gate-ah ni 22 lirthei an tang tawh a, helai hmunah hian truck 400 vel an tangkhang mek a ni. Ei tur leh tui an tlakchham tawh avangin Manipur sorkar chu Imphal thlenga bungraw phurh phalsak turin an ngen bawk. Transporter-te chuan venhimna pawh a ṭha tawk lo tih sawiin, tun dinhmunah Central Reserve Police Force (CRPF)-a company pariat chauh an awm thu leh, mimal convoy-in lirthei 150 vel an enkawl niin sawi a ni. Council chuan Chief Minister chu he thil hi ngaihven thuai tur leh, NHIDCL-te pawh a rang lama kawng siamṭhat hna thawk turin an ngen bawk.