Assam-Arunachal ramria inkahnaah mi 18 an hliam

Assam-Arunachal Pradesh ramria silaia inkahna thlengah, mi 18 chuangin hliam an tuar a, an zinga pali chu an dinhmun a ṭha lo hle nia sawi a ni. He inkahna hi Arunachal Pradesh lam aṭanga tu tih hriat lohten silai an hmeh puah avanga thleng a ni. He inkahna hi Mingmang Basti-a dan loa khawsa an awm nia sawi chungchanga buaina chhuak a ni. Hliam tuarte hi a bulhnai damdawi-inah hruai an ni a, dinhmun ṭha lo palite chu Dibrugarh-a Assam Medical College and Hospital-a enkawl turin sawn an ni.

He thil thleng hi Assam-a Dhemaji district ramri, Arunachal Pradesh-a Lower Siang district-a Kangku Circle bula ṭhalai pakhat kahhlum nia sawi a nih vang a ni. Report- a lan danin, he ṭhalai hi a awmna chin hriat a nih loh hnuah a keah silaia kahna hliam tuar a hmuh a ni. Silaia kaptu nia sawi hi tun thlengin tunge a nih tih hriat a la ni lo. He inkahna thleng vang hian Assam-a Dhemaji district leh Lower Siang-ah buaina a chhuak ta a ni.

Assam chief minister Himanta Biswa Sarma chuan, Assam leh Arunachal Pradesh Chief Secretary-ten inbiakna an nei dawn tih a sawi. Hei bakah state pahniha Police Director General-te pawhin inbiakna an nei dawn tih a sawi. He thil thleng hi hun rei tak aṭanga Assam leh Arunachal Pradesh inkara ramria buaina a awm tawh vang a ni. Inter-state boundary-a hmun eng emaw zatah buaina a la chhuak reng bawk.