Manipur : CM hoin high-level meeting nei

Manipur chief minister Yumnam Khemchand Singh chuan nimin, August 10 khan state khawpui Imphal-ah High-level Combined Headquarters (Unified Command) security meeting a kaihruai a, state-a National Highway-a dan leh thupek dinhmun leh venhimna kalpui mekte thlirletna an nei.

Meeting hi Chief Minister's Secretariat-ah neih a ni a, sorkar official, sipai, central armed police force-te leh intelligence agency-te an tel. Chief Minister chuan state puma venhimna leh dan leh thupek kenkawh dan a endik a, National Highway-a venhimna kalpui mek dan a enfiah bawk. Unified Command meeting neih zawhah, CM Singh chuan security official-te nen high-level meeting a kaihhruai a, he hunah hian transporter aiawhte nen Imphal-Guwahati leh Imphal-Dimapur bus service chhunzawm dan tur an sawi ho.

He thil hi August 8-a Kangpokpi district headquarters-a Chief Minister, Deputy chief minister Nemcha Kipgen leh Saitu MLA Haokholet Kipgen-te'n inter-state bus service kalpui ṭan a ni dawn tih an puan aṭanga ni eng emaw zat liam hnuah neih a ni. Sorkar chu security agency hrang hrang leh transport aiawhte nen thawk hoin service ṭan a nih thuai theihna turin hma an la a, Manipur leh a ṭhenawm Assam leh Nagaland nena inkalpawhna siamṭhat beisei a ni bawk.