PMAY-U kalpui hlawhtling zingah Nagaland tel

Nagaland chu Pradhan Mantri Awas Yojana-Urban (PMAY-U) kalpui zinga state hlawhtling ber pawlah langin, he scheme hnuaiah hian chenna in 30,000 chuang sak zawh tawh a ni a, hamṭhatna dawngtute kutah hlan a ni tawh bawk.

Ministry of Housing and Urban Affairs chuan, Nagaland-ah hian PMAY-U hnuaiah chenna in 31,860 sanction a ni tawh a, sorkar laipui aṭangin ṭanpuina sum Rs vbc 503.91 an dawng tawh a ni. Heng zingah hian chenna in 30,202 sak zawh tawh a ni a, ramchhunga he scheme kalpui ṭha ber zingah an tel a ni. He thu hi Housing and Urban Affairs secretary, Satendra Singh kaihhruaia Central Sanctioning and Monitoring Committee meeting neihah tarlan a ni. Committee chuan state 16 leh Union Territory-a Economically Weaker Section (EWS) chhungkaw tan PMAY-U 2.0 hnuaiah chenna in nuai 2.09 chuang a sanction a ni.

Nagaland hian he scheme hi 96% a thawk zo tawh tih PMAY-U State Mission director, Temjenrenla Kechu chuan a sawi. PMAY-U 2.0 hnuaiah hian sum lama ṭanpuina chu beneficiary pakhatah Rs nuai 2.5 ah tihpun a ni. Angikaar campaign chu Nagaland-ah hian awareness programme leh loan mela hmanga kalpui a ni a, hei hian chhungkua hamṭhatna dawngtute tan chenna in sakna turah a pui dawn a ni. He scheme hi thingtlangah pawh huang zauh a ni a, PMAY-Gramin hnuaiah chenna in 48,826 sanction a ni a, 19,300 sak zawh tawh niin, official-te chuan chenna in sakna atan hian mau leh lungte pawh hman a nih thu an sawi.