Assam : Bhukhan Pathak-a'n tuilian tuarte puihbawmna pe

Assam-a YouTuber leh social media influencer hriat hlawh, Bhukhan Pathak chuan state-a tuilian tuarte chhawmdawlna atan ke pen chhuakin, harsatna tawkte hnenah sum lama ṭanpuina leh chhawmdawlna a pe. A hmalakna thawh khatnaah Bhukhan chuan Sivasagar leh Jorhat district-a tuiliante tuar chhawmdawlna atan relief material, Rs nuai 3 man hu a pe chhuak a ni.

Bhukhan chuan ṭanpuina atana sum a sen Rs nuai 1.5 chu a mimal sum aṭanga hman a ni a, Rs nuai 1 chu mipui vantlang sum tlingkhawm aṭangin a ni. Hei bakah, nitin mamawh hrang hrang Rs 50,000 man hu pek chhuah a ni bawk. He puihbawmna hian tuilian avanga harsatna tawkten ei leh in bakah, nitin khawsakna atana an mamawhte lei nan hman a ni. Chhawmdawlna sem chhuah thawh khatna zawhfel a nih hnuah, Bhukhan chuan a thawh hnihna a kalpui leh mek bawk.

Ṭanpuina thawh hnihnaah hian tuilianin chenna in a tihchhiatte siamṭhat hna thawh a ni dawn. Bhukhan chuan chenna in chhiate siamṭhatna atan hian sum leh pai a tuak mek a, tun dinhmunah Rs nuai 1.5 hmuh chhuah a ni tawh. Mipui lam pawhin an thawh belh mek bawk. Heng ṭanpuina sum hmang hian chen lailawkna tur sak a ni dawn a ni. Kum 2018 aṭang khan Bhukhan hian Assam-a tuilian tuarte puih hna hi thawk ṭanin, amah thlawptute chuan tuilian tuarte tan vawi tam tak a lo pen chhuak tawh tih an sawi.