Assam : Chief Secretary hoin tuilian tuar chhawmdawl dan endik

Assam chief secretary Ravi Kota hoin Jorhat, Sivasagar, Charaideo leh Golaghat-a district thuneitute nen high-level review meeting neih a ni a, tuilian tuarte chhawmdawl kawnga hmalaknate enin, harsatna tawkte enkawl zuina leh an nitin khawsak siamṭhat kawnga hna thawh dante an thlir ho a ni.

Video conference hmanga District Consultative Committee (DCC) meeting neihah hian district commissioner, bank, insurance company leh line department hrang hrangte an tel a, chhiatna thleng endik, sum lama ṭanpuina leh insurance claim settlement chungchangah thawh hona tihchak dante an ngaihtuah a ni. Chief Secretary chuan thawh hona ṭha siam a, agency tam zawkin mawhphurhna an lak a ṭul thu a sawi. Tuilian vanga harsatna tawkten ṭanpuina a rang lama an dawn a pawimawh tih a sawi bawk.

Sawi honaah hian lo neih, ran vulh, sangha khawi, chenna in, MSME leh a kaihhnawih sector hrang hrangte pawh an ngaihtuah tel a ni. Official-te chu August 14 hmain field-level verification hmanga tuilianin chhiatna a thlente diktaka tifel tura hriattir an ni a, sector hrang hrang report chu August 18 hmain committee-ah theh luh tur a ni. Chhawmdawl hna thawh chak zawka kalpui a nih theihna turin Jorhat, Sivasagar, Charaideo leh Golaghat-ah insurance nodal officer ruat an ni tawh bawk. Tuilian tuar tam takin an document pawimawh an tihbo avangin, Chief Secretary chuan thuneitute chu documentation awlsam zawka siam turin a hriattir a, original record tihbote chu verification awlsam zawka siam phalsak turin a hriattir bawk.