Assam : Cachar-ah ruihhlo Rs vbc 28 man hu man

Assam-a Cachar district-a police-te leh Assam Rifle ṭangkawp chuan ruihhlo Rs vbc 28 man hu an man a, heng ruihhlo tawlhrutu nia rinhlelh mi pathum man an ni tih chief minister Himanta Biswa Sarma chuan a sawi. Team ṭangkawp chuan Yaba tablet nuai 1.1, kg 14 vel leh sahbawm bawm 10-a heroin dah gram 223 an man tih Chief Minister chuan Thawhlehni zan khan a social media-ah an tarlang.

An mi man pathumte hi Mayajul Haque (23), Stelmon (19) leh Nur Hussain (32) an ni a, Narcotic Drugs and Psychotropic Substances (NDPS) Act hnuaiah thubuai ziah luh a ni.

Cachar police-te chuan ruihhlo leh a kaihhnawih tawlhruk a awm nia report an dawn hnuah beihpui an thlak nghal tih thuthar lakhawmtute an hrilh. Cachar district-a ruihhlo do beihpui thlakna neih mek laia ṭum khata ruihhlo an man tam ber zinga mi a nih thu an sawi bawk.

State sorkarin ruihhlo do kawngah hma a la chhunzawm zel tih tarlangin, CM Sarma chuan ruihhlo tawlhrukna network zawn chhuah kawngah khauh takin hma a la chhunzawm zel dawn tih a tarlang bawk. Yaba hi 'crazy medicine' tiha sawi a ni a, methamphetamine leh caffeine a tel avangin a ngawl vei a awl hle nia sawi a ni. Police-te chuan chhuizuina an neih chhunzawm zel a, ruihhlo tawlhrukna network dangte nen an thawh hona hmuhchhuah ngei an tum a ni.