Tripura : Electric hmang tui pump-na solar-in thlak dawn

Tripura Renewable Energy Development Agency (TREDA) chuan, electric hmang tui pump na 5,000 vel chu ni zung chakna hmang, solar-in a thlak dawn a, hei hian state-a electricity-a sum hman a tihtlem dawn bakah, hmun hla leh tlawhpawh harsaahte tui supply rintlak pek an ni thei dawn tih an tarlang.

Drinking Water and Sanitation (DWS) department chuan state puma electric hmanga tui pump na 10,000 vel atan kumtin Rs vbc 125 dawn hman ral ṭhin a ni tih an sawi. TREDA director general Debabrata Sukladas chuan, chief minister Manik Saha kaihhruaina hnuaia review meeting neih a nih hnuah tui pump-na atana sum tam tak senral a nih ṭhin chungchang hi ngaihtuah ho a nih thu, sum hman tihtlem a nih theih dan tute ngaihtuahin he thutlukna hi siam a nih thu a sawi a ni.

Sukladas chuan Chief Minister thupek angin, electric hmang tui pump na 5,000 vel chu solar hmanga thlak tur niin, a thawh khatnaah hian tui pump-na 2,300 chu Rs vbc 60 sengin solar-a thlak a ni phawt dawn a ni, a ti. Project tender pawh siam tawh niin, rei loteah thawh ṭan a ni ang. TREDA chuan a thawh khatna hi financial year 2026-28 chhunga peihfel an tum tih an tarlang. Sukladas chuan tui pump 2,300 te solar hmang tura siam danglam a nih chuan, DWS department-in electricity-a sum a sen ṭhin aṭangin kumtin Rs vbc 5 vel an hum thei dawn niin a tarlang. Thla hmasaa 'Destination Tripura: Business Conclave' buatsaihah khan an state-a renewable energy sector chuan investor ṭha tak an hmuh thu a sawi bawk.

"State-a power sector chuan Rs vbc 17,000 hu investment proposal a dawng a. Heng rawtna lo lut zinga a hlawm lian ber hi ni zung chakna, solar energy lam a ni. Investment proposal-te hi hna puitlinga chantir turin hma kan la mek a ni,' tiin a sawi."