Arunachal : IMD-in orange alert tichhuak

India Meteorological Department (IMD) chuan, Arunachal Pradesh hmun ṭhenkhatah tun kar tawp lam hian ruah nasa tak leh thlipui tleh thei dinhmunah an awm tih tarlangin, orange alert a tichhuak.

District dang eng emaw zat chu yellow alert hnuaiah dah an ni a, district tlem zawk chu orange alert hnuaiah an awm. Mipuite chu inralring turin an chah a ni. Weather department chuan vawiin Nilaini hian ruahsurin ziaawm lam a pan an rin thu an sawi a, hemi rual hian Papum Pare bakah district hrang hrangah yellow alert puan chhunzawm zel a nih tur thu an tarlang. State-ah hian ruah a sur chhunzawm zel avangin tuilian leh leiminin nghawng a nei nasa tawh hle. Official-te chuan mi pasarihin nunna an chan tawh a, state pumah mi 1,55,850 velin harsatna an tawk tawh tih an sawi. Kumin fur ruahtui tla nasa hian district 28-a circle 382-a khaw 674 a nghawng buai tawh a ni.

IMD chuan Ningani aṭangin khua a ṭhat chhoh an rin thu sawiin, state hmun tam zawkah warning tihchhuah a ni lo tih an puang. Chhim lam district tlem zawkah ruah nasa tak a sur an rin avangin yellow alert puan chhunzawm a ni thung. State Disaster Management Department chuan mipuite chu ṭul loa zin chhuak lo tur leh, veivakte pawh kawng dinhmun thlithlai hmasa tura hriattir an ni.