Nagaland : Organ transplant facility centre din tum

Nagaland chuan organ transplant service kalpui a nih theihna turin nasa takin hma a la mek a, Naga Hospital Authority Kohima (NHAK) chuan organ transplant centre din a nih theihna tur hian registration leh licensing a buaipui ṭan bawk.

He thu hi Health & Family Welfare principal director, Dr. Mereninla Senlem chuan Thawhṭanni khan MOHAN Foundation-in NHAK leh State Organ and Tissue Transplant Organization (SOTTO), Nagaland nen an thawh dunnaa Indian Organ Donation Day programme a buatsaihah a puang a ni. Programme thupui atan 'Stories of Hope, Gifts of Life: Promoting Organ Donation in Nagaland' tih hman a ni.

Kalkhawm hmaa thu a sawiah, Dr. Senlem chuan organ donation leh transplant service thuam chak tuma hma lak mek a nih thu a tarlang. State-ah transplant service kalpui la ni lo mah se, infrastructure mamawh din tum mek a ni, a ti. NHAK chuan transplant service kalpui a nih theihna turin inziahluh leh license neih dan tur a buaipui ṭan tawh thu leh, healthcare huang zauh turin sorkarin theihtawp a chhuah tih a sawi bawk.

Dr. Senlem chuan taksa peng mi dangte tana donate chuan nunna tam tak a chhanhim thei tih sawiin, huaisenna, mi dangte lainatna leh thil phalna a entir tih a sawi. Ramchhungah kal ṭha lo avanga harsatna tawk an pung chho zel tih sawiin, damlo 90,000 vel kal thlak ngai an awm tih a sawi. Hetiang a nih avang hian awareness neih nasat a ngai tih a sawi bawk a ni.