Assam : CM-in tuilian thlenna hmun tlawh

Assam chief minister Himanta Biswa Sarma chuan Upper Assam district-a Nazira, Mahmora leh Sonari Assembly biala tuilian thlenna hmunte tlawhin, tuilian dinhmun leh thil a tihchhiatte a endik. Tun hi tuilian thlen nasatna Charaideo leh Sivasagar district a tlawh vawi hnihna a ni.

CM Sarma chuan Nazira biala tuilian thlenna Santak, Nepalikhuti leh Sundarpukhuri bakah, Sonari biala Mahmora-a Chomoni khua leh, Sonari khuaa Ward No.8 te tlawhin, tuilian vanga harsatna tawk chhungkuate nen inbiakna an neih bakah puihbawmna a pe bawk. Chief Minister chuan Tractor hmangin Nazira bial hnuaia Bihubar-a tuilianin a tihchhiat Nepalikhuti huam chhung a enfiah bawk.

Tuilian tuar mipuite nen inbiakna an neihah, Sarma chuan August 9 aṭangin sorkar official-ten chenna in an tlawh ṭan dawn thu leh, hemi hnuah chhawmdawlna pek ṭan an nih tur thu a sawi bawk. Tuilian thlenna hmunah health camp buatsaih a ni dawn a, loneitute chu lo neih hna an thawh leh thuai theihna tura pui turin sorkarin ṭanpuina huang a zauh dawn tih a sawi bawk. Hun lo awm turah tuilian avanga mipuiin harsatna nasa tak an tawh lohna turin state sorkarin hma a la dawn tih a sawi.

Chief Minister hian Charaideo district-a Mahmora biala tuilian thlenna hmun a tlawh bawk a, lawng hmangin Chomoni khuaa tangkhang chhungkaw eng emaw zat dinhmun a enfiah a ni. Hemi hnuah Sri Sri Hari Namghar khaw mipuite nen inbiain, tuilian avanga nunna chan mi 14 chhungte hnenah Rs nuai 5 ṭheuh a pe. CM hian Moran Gaon-a Sri Sri Gobinda Namghar a tlawh bawk a ni.