Meghalaya-ah kum dang aiin ruahtui tla tlem

Meghalaya-ah kumin hian kum dang aiin ruahtui a tla tlem a, kum hmasa lam aiin ruahtui hi 57% in a tla tlem a ni. India Meteorological Department (IMD) data-a a lan danin, kumin June 4 aṭanga July 28 inkar khan Meghalaya-ah hian ruahtui mm 272.9 a tla a, kum dangah chuan mm 632.1 a tla ṭhin.

Khawvela ruahtui tlak tamna ber nia sawi ṭhin Sohra-ah pawh kum dang aiin ruah a sur tlem a, khawthlang district lam pawh khua a ro hle nia sawi a ni. Ruah tui tla tlem hian lo neihna hmun leh tui supply a nghawng nasa hle bawk.

Ruah a sur tlem avangin buh chinna hmun leh lo neihna a nghawng nasat rin a ni. West Jaintia Hills-ah ruah hi 78% in a tla tlem a, West Garo Hills-a ruah mm 1,092 tla ṭhin chu kumin hian mm 339 chauh a la tla bawk a, 69% in a tlahniam a ni. East Garo Hills, Ri Bhoi, South Garo Hills leh South West Garo Hills-ahte pawh ruahtui a tla tlem hle a, West Khasi Hills, West jaintia Hills, West Garo Hills, North Garo Hills leh East Jaintia Hills-te pawh ruahtui tlak tlemna catergory-ah an awm a ni.