Manipur : CM-in ṭhalaite ruihhlo laka fihlim turin chah

Manipur chief minister Yumnam Khemchand Singh chuan nimin, Pathianni khan ṭhalaite chu ram leh hnam tundinna atan ruihhlo laka fihlim turin a chah. Chief Minister chuan Manipur University-a state-level "Nasha Mukta Yuva for Viksit Bharat Sankalp Abhiyaan" hawnnaah he thu hi a sawi a ni. He campaign hi prime minister Narendra Modi chuan virtual-in rampum tan a hawng a ni.

Programme hi Manipur University-a NSS Cell chuan, Ministry of Youth Affairs and Sports hnuaiah state NSS cell thawhpuinaa a buatsaih a ni. Virtual hmanga thu a sawiah, PM Modi chuan taksa leh rilru hrisel nei tur chuan ruihhlo laka inthiarfihlim a pawimawh thu a sawi. Ramchhung ṭhalaite chu anti-drug hmalakna thlawp turin a chah bawk.

Imphal-a programme buatsaihah hian CM Singh chuan Viksit Bharat @2047 hmathlir chu ṭhalai hrisel leh ruihhloin a tihbuai loh hmanga hlawhtling thei a nih thu a sawi. State ṭhalaite chu ruihhlo leh a kaihhnawih hmang sual lo tur leh, state bakah ram hmasawnna atana ke pen turin a chah. Ṭhalaite chu thutlukna dik siam tur leh, khua leh tui tana ṭangkai turin a ngen bawk.

Ruihhlo hmansual hlauhawmnate tarlangin, Khemchand Singh chuan pawl hrang hrangte nen inbiakna an neihah, ṭhalaite hnena ruihhlo supply-tu network an awm tih sawiin, state sorkar chuan ruihhlo tawlhruk do kawnga a hma a lak nasat thu leh, ruihhlo laka ṭhalaite venhim kawngah hma lak chhunzawm zel a ni dawn a ni, a ti.