Assam : CM-in tuilian tuar nasa district-te tlawh ṭan

Assam chief minister Himanta Biswa Sarma chuan state-a tuilian tuar nasa district-te tlawh ṭanin, nimin khan Dibrugarh district a tlawh a, chhawmdawl hna thawh dan leh, tuilianin a tihchhiat siam ṭha tura inbuatsaihnate a endik. Tun dinhmunah tuilian hian ziaawm lam a pan tawh a, harsatna tawk pawh mi nuai 1.78-ah a tlahniam tawh a ni.

Assam State Disaster Management Authority (ASDMA) in thuchhuah a siam hnuhnung berah, Golaghat, Sivasagar, Charaideo, Bajali, Dhemaji, Sonitpur leh Korhat district-a khaw 349 chuan tuilian vang hian harsatna an la tawk tih a tarlang. Tuilian vang hian mi 82 an thi tawh a ni. Charaideo chu tuilian tuar nasa ber district ni chhunzawm zelin, mi 75,199 in harsatna an tawk a, Sivasagar-ah 58,824-in harsatna an tawk bawk.

Chhanchhuah leh chhawmdawl hna thawh chhunzawm zel niin, relief camp 44-ah mi 15,000 awmin, relief distribution centre 17 chuan mi 5,569 hnenah puihbawmna a pe bawk. Tuilian hian lo neihna hmun, ram hectare 15,060 a chim tawh a, ramsa 1,543 chu tuilian hian lain ran vulh 6,765 a nghawng bawk a ni.

CM Sarma chuan prime minister Narendra Modi leh union home minister, Amit Shah-ten puihbawmna an pek avangin lawmthu a sawi. State Disaster Response Fund (SDRF) aṭanga Rs vbc 379.35 pek chhuah a ni leh, Ministerial Central team-te chhan chhuah hna thawk tura an tirh avangin lawmthu a sawi bawk.

Inrinni liam ta khan CM hian social media-ah live session neiin, tuilian tuarte chhawmdawlna tur hrang hrangte a puang. Tuilian tuar nasa zinga mi, Sivasagar leh Charideo district-ah July thla bik atan domestic leh Jeevan Dhara consumer-te chu an electric hman, unit 300 chin chu bill chawitir an ni dawn lo tih a sawi a, an chawi tur ai hian Chief Minister's Relief Fund aṭangin peksak an ni ang. Tuilianin an chenna in a tihchhiat chhungkuate hnenah state sorkarin puihna, Rs 15,000 ṭheuh a pek tur thu a sawi. He puihna dawng thei tura tihte hi Sivasagar-ah chhungkaw 55,000, Charaideo-ah 20,000, Jorhat-ah 7,000 leh Golaghat-ah 3,000 dawn an tling. Puihna hi August 3-5 inkarah pek vek an ni ang a, Augst 10-ah Rs 10,000 pek an ni leh bawk ang.