Manipur : Naga village guard kap hlum; mi 3 in hliam tuar

Manipur-a Noney district-a Bitiang khuaa Naga Village Guard (NVG) training camp-a silai hmehpuah a nih avanga beihpui thlaknaah, village guard pakhat chu kah hlum a ni a, mi pathumin hliam an tuar bawk. CRPF-a CoBRA unit-a mi pahnih pawhin hliam an tuar tih tualchhung thuneitute chuan an sawi.

He thil hi July 29 zinga Bitiang huam chhunga thleng nia sawi a ni. Village guard zinga hliam tuarte chu Noney District Hospital-ah dah an ni a, CoBRA aṭanga hliam tuarte chu Imphal-a enkawl tura sawn an ni bawk. Hemi hnu hian security force dah belh niin, helai hmunah hian chhuizuina neih chhunzawm zel a ni. Tualchhung thuneitute chuan training camp-ah hian CoBRA sipai 300 chuangin beihpui an thlak thu leh, hemi hun chhung hian silai hmehpuah a ni tih an sawi a, silaia inkahna thlen chhan erawh hriat a la ni lo.

He thil thleng vang hian Longmai huam chhung khaw eng emaw zat aṭanga hmeichhia leh ṭhalaite chu pungkhawmin lungawi lohna an lantir a, security force-te chuan village guard-te lakah tharum an thawh tih an sawi. Lungawi lohna lantirtute chuan volunteer thih chhan leh midangin hliam an tuar chhan hriat chian an phut bawk. Naga pawl hrang hrang chuan he thil thleng hi an dem hle a, security force-te chuan Kuki helpawl laka khaw veng himtute an bitum niin an puh bawk.