Assam : Tuilian vanga thi mi 78 tling tawh; mi nuai 3 velin harsatna tawk mek

Assam-a ruahsur nasa avanga tuilian thlengah mi 78 an thi tawh a, Sivasagar leh Golaghat district-ah mi pathum an thih belh a, district pasariha mi nuai 3 chuangin harsatna an tawk mek tih sorkar thuchhuah thar ber chuan a tarlang. Tuilian vanga thi puan tharte hi Sivasagar aṭangin mi pahnih leh Golaghat aṭangin mi pakhat an ni tih Assam State Disaster Management Authority (ASDMA) chuan a sawi.

Tuilianin a nghawng district pasarih- Sivasagar, Charaideo, Golaghat, Jorhat, Nagaon, Biswanath leh Kamrup Metropolitan-a cheng mi 3,00,031 vekin harsatna nasa tak an la tawk chhunzawm zel a ni. Tuilian hian revenue circle 21 leh khaw 551-ah harsatna a thlen mek a, thlai chinna hmun hectare 21,523.08 chu tuiin a chim tawh bawk a ni.

Tun dinhmunah Charaideo district chu a tuar nasa ber niin, mi 1,37,561-ten harsatna an tawk tawh a, Sivasagar-ah mi 84,600 leh Jorhat-ah mi 49,911-te a nghawng tawh bawk. Thawhlehni khan district paruka nuai 3.32 ten harsatna an tawk tawh a, district ṭhenkhatah tuilian vanga harsatna thleng hi awm mah se, a pumpuiah tuilian hian ziaawm lam a pan tawh thung.

Disaster management thuneitute chuan chenna in chhuahsan mi 16,500 chu relief camp-ah awn awm mek a, relief distribution centre 30 kaltlangin mi 72,000 te chu puihbawmna pek an ni tih an sawi. Medical leh veterinary team bakah rescue agency hrang hrangte chuan chhan chhuah leh chhawmdawl hna an thawk chhunzawm zel a ni. Tuilian hian infrastructure, kawng, chenna in, sikul leh vantlang bungrua a tichhe nasa hle bawk. ASDMA chuan ramsa 11,000 chuang tuilian hian a la a, ran vulh 17,000 vel a nghawng bawk a ni.