Arunachal : Lirthei 11 rubotu mi 6 man

Arunachal Pradesh police-te chuan state khawpui, Itanagar-a Nirjuli huam chhunga lirthei ruk chungchanga beihpui thlakna lian tham an neihah mi paruk an man a, an mi man zingah hian kum tling lo pahnih an tel. Two-wheeler rukbo 11 an hmuchhuak bawk.

Police-ten lirthei an hmuh chhuahte hi lirthei ruk thubuai chhui chianna an neih mek laia mi a ni. Itanagar police superintendent Nyelam Nega chuan, sub-inspector Topi Josam leh sub-inspector Gopal Tok-te kaihhruai investigation team pahnih chuan an thudawn bawhzuiin beihpui thlakna hi an nei a ni. An mi mante hi lirthei rukbo thubuai dangah an inhnamhnawih em tih an chhui zui zel thu leh, thil ruk dang zawng zawng pawh hmuh chhuah an tum thu an sawi.

SP chuan mipuite chu lirthei an dah danah fimkhur turin a chah a, thla eng emaw zat chhunga two-wheeler rukbo nia report siamtute chu SDPO Naharlagun emaw, Nirjuli Police Station-ah document kimchang keng turin a hriattir. Lirthei rukbo hmuhchhuah zingah an lirthei bo a tel em tih finfiah turin a ngen bawk.