Meghalaya : Cabinet-in EV policy pawm

Meghalaya Cabinet chuan Thawhṭanni khan Meghalaya Electric Vehicle (EV) policy, 2026 a pawm a, state puma electric lirthei hman uar a nih theihna atan incentive leh hamṭhatna dang siam a ni. Cabinet meeting zawha thuthar lakhawmtute a kawmnaah, cabinet minister Marcuise N. Marak chuan electric lirthei lei apiangte chuan incentive Rs 25,000 an dawng dawn tih a sawi.

Sorkar chuan policy thar hnuaiah hian electric lirthei zawng zawng registration fee hlihsak turin thutlukna a siam bawk. He hmalakna hmang hian boruak thianghlim siam leh, fuel hmang lirtheia innghahna tihtlem a tum tih a tarlang.

Cabinet chuan EV policy bakah B.M. War, Meghalaya Energy Corporation Limited (MeECL)-a Chief Engineer (Civil) chu, Chief Technical Advisor (Generation) a huang zauhna tur a pawm bawk. 220/132 KV Secondary Sub-Station awmsa leh 132/33 KV, 2×50 MVA Mawkhanu Sub-Station siam tur nena thlunzawmna tur, km 6.5-a thui 132 KV transmission line siamna atan Rs vbc 22.37 a sanction bawk. Sum pawmpui zingah hian transmission corridor atana Right of Way (RoW) mamawh zat compensation a tel a ni. Sorkar chuan project hian state-a electric transmission network a tichak dawn a, power infrastructure a thuam chak dawn tih a sawi.