Assam : MLA-ten tuilian tuarte tan an thla khat hlawh thawh dawn

Assam-a Raijor Dal party MLA tih loh, party danga MLA zawng zawng chuan an thla khat hlawh chu state chhunga tuilian tuarte chhawmdawlna atana an thawh dawn tih an puang.

Speaker Ranjeet Kumar Dass chuan nimin khan Assembly House-ah deputy speaker Habbey Teron nen an thla khat hlawh chu tuilian vanga harsatna tawkte ṭanpuina atan an thawh dawn tih nimin khan a puang a, anni bakah Asembly Secretariat-a thawk zawng zawngte chuan an ni khat hlawh ṭheuh an thawh dawn bawk a ni.

Speaker-in an sum thawh tur a puan hnuah, parliamentary affairs minister Pijush Hazarika chuan an thiltih chu fakin, BJP MLA-te pawhin an thla khat hlawh ṭheuh chu ṭanpuina atan an thawh ve tur thu a puang ve nghal a ni. Hemi hnuah Trinamool Congress MLA awmchhun, Sherman Ali Ahmed chuan tuilian tuarte tan a thla khat hlawh a thawh tur thu a sawi ve leh a; Congress party hruaitu, Leader of Opposition Wajed Ali Choudhruh pawhin an party chuan harsatna tawkte tan chhawmndawlna eng emaw zat an pe tawh a, an MLA te pawhin an thla khat hlawh an thawh dawn tih a puang ve leh nghal bawk.

AIUDF Mazibur Rahman chuan party hming angin ṭanpuina lo pe tawh mah se, member dangte tih ang bawkin an party MLA-te chuan thla khat hlawh an thawh ve dawn tih a sawi a, AGP leh BPF pawhin ṭanpuina an pek tur thu hi an puang ve leh a ni. Raijor Dal party erawhin engmah an la sawi ve lo thung.

Assam-a tuilian hian ziaawm lam pan deuh tawh mah se, mi tam takin harsatna an la tawk a ni. Tuilian vanga thi hi mi 68 an awm tawh bawk. Tuilian tuarte awmna tur hian relief camp 90 siam mek a ni a, heng hmunah hian mi 30,000 dawn an khawsa a, relief distribution centre 94 siam a ni bawk. Assam State Disaster Management Authority (ASDMA) chuan tuilian hian thlai chinna, ram hectare 37,139.52 a zau a chim a, ran vulh 26,679 vel a len bawk niin a tarlang. District hrang hrang aṭangin kawng leh infrastructure chhia report a awm bawk a ni.