Assam : Sivasagar DC-in tuilian tuar chhawmdawl hna thawh endik

Assam-a Sivasagar district deputy commissioner, Mridul Yadav chuan tuilian vanga harsatna tawkte chhawmdawlna hna thawh dan a endik a, khaw 301-ah mi nuai li velin harsatna an tawk a, nunna chan, bungraw chhia leh khawsak phung nasa takin a tibuai tih a sawi.

Press conference-a thu a sawiah, Yadav chuan tuilian tuar chhawmdawl hna thawh, chhan chhuah hna leh puihbawmna pek dan kimchang a tarlang a, district administration leh sorkar agency hrang hrang ṭangkawp chuan tuilian vanga chhiatna thlengte siamṭha turin theihtawp an chhuah tih a sawi bawk.

Tuilian chuan chhungkaw sang tel chenna in a tihchhiat bakah, lo neihna leh khawsak phung nasa takin a tibuai tih a sawi. Tuilian vang hian mi 30-in nunna an chan thu leh, mi pasarih an awmna chin hriat a la ni lo tih tarlangin, zawn hna kalpui mek a ni tih thuneitute chuan an sawi bawk. Chhan chhuah hnathawh dan tarlangin, Yadav chuan mi 20,000 vel chu State Disaster Response Force (SDRF), National Disaster Response Force (NDRF) tualchhung volunteer-ten hmun him lamah an sawn tih a sawi. Chhan chhuah hna thawhna atan hian SDRF leh NDRF lawng 60 bakah tualchhung siam lawng 62 hman a ni.

District administration hian relief camp 50 chuang a siam a, chenna in chhuahsante tan relief distribution centre din a ni bawk. Puihbawmna hna thawh thawh khatna chu zawh fel a ni tawh a, a thawh hnihna pawh kalpui a ni leh thuai dawn tih an tarlang. Yadav chuan Chief Minister's "CM Family Kit" pawh kalpui a ni thuai dawn tih a sawi.