Manipur CM leh Meghalaya CM inhmu

Manipur chief minister Yumnam Khemchand Singh leh Meghalaya chief minister, Conrad K. Sangma-te chu Zirtawpni khan inhmuin, hmasawnna ngelnghet leh mitin huap ṭhanlenna a awm theihna tur an sawi dun. CM Sangma hi National People;s Party, Manipur president Lorho S. Pfoze, minister Kh. Loken Singh leh MLA-ten an ṭawiawm a, Manipur Chief Minister hi a chenna inah Zirtawpni zan khan an hmu a ni.

He hunah hian NPP palaite chuan party-in rawtna an neih leh an thil ngaih pawimawh tarlanna memorandum an thehlut. CM Singh chuan rawtna awmte chu ngaihtuah thuai a nih tur thu a lo hrilh a, a social media-ah mitin huap hmasawnna atana an hmathlir inangte chu an chhawmnung chhunzawm zel dawn tih a tarlang. Meeting hi Manipur-a NPP-in kumtin convention an neih hmaa buatsaih a ni a, hmasawnna lama thawh hona tihchakna tura party hruaitute leh state sorkar thawh hona pawimawh tak a ni.

Meghalaya chief minister Conrad K. Sangma hi ni hnih cham turin Manipur a tlawh a, Imphal Airport a thlen hnuah NPP Manipur state unit-a office thar hawng turin Mantripukhri a pan nghal a, he hunah hian Lorho S. Pfoze, party MLA-te leh office bearere-ten an ṭawiawm a ni. CM Sangma chuan office hawn thar chu party inkaihhruaina thuam chakna atan a pawimawh thu leh, tualchhung member-te thawhrimna tihhlawhtlinna tur a nih thu a sawi. Hawnna inkhawm buatsaih a nih hnuah, party MLA-te leh office-bearer-te nen closed-door meeting an nei bawk.