Chhaintoil-ah hmeichhe naupang enkawlna hmun din a ni dawn : Tripura Minister

Tripura Social Welfare and Social Education minister, Tinku Roy chuan nimin Pathianni khan Chandipur Assembly bial hnuaia Chhaintoil khuaah hmeichhe naupang, fahrah enkawlna hmun bik din a nih tur thu a puang. He hmalakna hi hmeichhe naupang nu leh pa nei lote humhimna, zirna, leh hmalam hun ṭha an neih theihna tur a nih thu a sawi.

He project pawimawhna sawilangin, Roy chuan hmeichhe naupangte chu khawtlang member zinga ngaihven ngai an nih thu leh, a bik takin an pian tirh aṭanga nu leh pa enkawltu nei lote chu ngaih pawimawh zual an nih thu a sawi. Hetianga enkawltu nei lo naupangte chu chenna in chauh ni loin; hmangaihna, enkawlna, zirna leh an tum ram tihhlawhtlin sakna hun remchang siamsak an ni dawn a ni, a ti.

Minister chuan institution ruahman chuan naupangte hmasawnna tur a ngai pawimawh ber dawn tih sawilangin, hnam ziarang leh activity hrang hrang; zai, rimawi, art, leh computer thiamna tur training pek an nih dawn bakah, zirna ṭha tak pek a tum thu a sawi. Hmeichhe naupangte chu mahni inrintawkna an neih theihna tur leh, khawtlang tana an thiam leh theihnate hmang ṭangkai thei tura zirtir an ni dawn tih a sawi. Roy chuan fahrah enkawlna hmun chu dinhmun hniam zawkte awmna anga thlir loa, hun lo awm tura doctor, zirtirtu, officer leh artist-te enkawlna hmun anga en a pawimawh thu a sawi bawk a ni.