Sikkim : Namchi district-a tunnel chim aṭangin ruang 25 la chhuak

Sikkim-a Namchi district-a hydropower project sak mek tunnel chimin a chim hnan, hnathawk 25-te ruang chu Ningani khan lak chhuah kim an ni. National Hydroelectric Power Corporation (NHPC) chuan hnathawk 25-te ruang chu tunnel chhung km 1.5 vel aṭanga lak chhuah an nih thu a tarlang.

He chhiatna hi July 20 chawhnu dar 1:04 vela thleng a ni a, methane gas nia sawi chu hnathawhna hmunah hian puakin tunnel hi a chim phah a ni. Central PSU leh Sikkim sorkar chuan he chhiatna thlen chhan hi chhui chian a ni dawn tih an puang tawh bawk. NHPC chuan mitthi chhungte hnenah zangnadawmna Rs nuai 5 pek an ni dawn tih an puang.

Tunnel chima thi zingah hian NHPC Limited, ARX, leh Patel Engineering Limited hnuaia hnathawkte pawh an tel. State 10 amite niin West Bengal aṭangin 11, Jharkhand aṭangin pali, Jammu and Kashmir leh Uttarakhand aṭangin pahnih ve ve, Kerala, Uttar Pradesh, Bihar, Sikkim, Punjab, leh Assam aṭangin pakhat ṭheuh an thi a ni. Mitthite ruang chu Singtam District hospital, STNM hospital, Namchi District hospital leh Central Referral hospital-ah dah an ni a, ruang hriat chian tawhte chu an chhungte kutah hlan an ni tawh bawk.