Assam: Tuilian vanga thi mi 47 tling tawh

Assam-a tuilian chuan zual lam panin, Ningani khan mi paruk an thih belh leh a, tuilian vanga nunna chan hi mi 47 an tling tawh a ni. Tuilian hian district 11-ah mi nuai 7.21 chuang a nghawng tawh tih Assam State Disaster Management Authority (ASDMA) chuan a tarlang. Ningania nunna chante hi Sivasagar aṭangin mi pali leh Chareideo aṭangin mi pahnih an ni.

ASDMA chuan Golaghat, Hojai, Kamrup, Charaideo, Jorhat, Dibrugarh, Sivasagar, Nagaon, Kamrup (Metro), Karbi Anglong leh Tinsukia district-a khaw 883-a revenue circle 37-ah mi nuai 7.21 chuangin harsatna an tawk tawh tih a tarlang bawk. Sivasagar chu a tuar nasa ber district a ni chhunzawm zel a, mi nuai 3.75 velin harsatna an tawk tawh a, Charaideo-ah nuai 1.86 leh Jorhat-ah mi nuai 1.15 velin harsatna an tawk bawk. Nilaini khan district 10-a tuilianin harsatna a thlente chu mi nuai 6.43 an tling tawh.

Relief camp 103-ah chenna in chhuahsan mi 24,124 an awm mek a, relief distribution centre 255 siam a ni tawh bawk. Tuilian hian loneihna hmun ram hectare 25,375.44 a zau a chim tawh a, thlai chin nasa takin a tichhe tawh bawk. Lui lian tam takin hlauhawm chhinchhiahna an pel tawh a, thuneitute chuan tuilian hian state hmun hrang hranga infrastructure a tichhe nasa tawh hle tih an tarlang.