Sikkim : CM-in Namchi district-a tunnel chim a tlawh

Sikkim chief minister Prem Singh Tamang chuan nimin Thawhlehni, July 21 khan Namchi district-a NHPC Teesta Stage VI Hydroelectric Project thawh meknaa tunnel chimna hmun a tlawh. Tunnel chima thi zat hi mi 10 an tling tawh a ni. Rescue team-te chuan chuan he chhiatna thlenna hmunah hian chhan chhuah hna an thawk mek a, CM chuan chhanchhuah hna kalpui dan endikin official-te nen inbiakna an nei bawk.

Chief Minister chuan sorkar laipui aṭanga puihbawmna an dawn thu a social media X-ah tarlangin, National Disaster Response Force (NDRF), State Disaster Response Force (SDRF), Sikkim State Disaster Management Authority (SSDMA), district administration, Sikkim Police, Fire and Emergency Service, medical team leh tualchhung volunteer-ten chhan chhuah hna ngawrh a takin an thawk tih a tarlang.

Governor Om Prakash Mathur pawhin helai hmun hi tlawhin, chhan chhuah hnathawh kalpui dan a endik a, nunna chan chhungte a tawrhpui thu a sawi. Hna thawktute himna tur ngaihtuah chungin a rang lama kalpui zel turin agency zawng zawngte a hriattir bawk. Official-te chuan Jholungey-a Samardung-a ADIT-3 tunnel chim aṭang hian ruang 10 lak chhuah an nih tawh thu an sawi.

Prime minister Narendra Modi chuan tunnel chim vanga nunna chan chhungte hnenah Prime Minister's National Relief Fund (PMNRF) aṭangin Rs nuai 2 ṭheuh pek an nih tur thu leh, hliam tuarte Rs 50,000 pek an ni dawn tih sawiin, chhiatna thleng chu pawi a tih thu leh, nunna chan chhungte a tawrhpui thu a sawi.