Manipur : NH-37-ah patrol team din

Manipur-a National Highway-37-a km 220-a thui, Imphal-Jiribam sector-a veivakte himna turin Highway Patrol Team din a ni a, hemi hmang hian dan loa sum inlaksak leh a kaihhnawihte tihtawp tum a ni. Kawnga lirthei tlan mumal zawka enthlithlai a nih theihna atan leh, harsatna tawk loa lirthei an tlan theihna tura hmalakna a ni bawk.

He Highway Patrol team hi deputy commissioner, Vidhyamari Sridhar-a'n dinin, District Administration aṭangin Executive Magistrate pakhat, Manipur Police, Central Armed Police Forces (CAPFs), National Highways & Infrastructure Development Corporation Limited (NHIDCL) aṭanga official-te leh, NH-37 siam leh enkawl hna thawktu contracting agency aiawhte an tel a ni.

Team hian dan loa sum inlaksakna thleng ṭhin venna atan highway-ah patrol leh endikna uluk takin an nei dawn a, veivakte tana harsatna thlen thei lakah hma an lak dawn bakah, kawng siam hna thawh mekte hmasawnna leh quality endikin stakeholder agency-te inkarah thawh hona ṭha a siam dawn tih Noney district-a District Information Officer chuan Inrinni khan a sawi. Department leh agency-te chu dan leh thupek kengkawh kawngah thawh hona ṭha nei tura tih an ni. Hemi chungchangah hian Noney DC Vidhyamari chuan highway-a veivakte leh bungraw phur lirthei bakah, mipui vantlang chu Highway Patrol team thawhpui ṭha tura ngenin, dan loa pawikhawihna thleng a awm a nih chuan thuneitute hnena hriattir turin a chah bawk.