Nagaland : Congress-in exam paper leak dodalna campaign chhunzawm zel tum

Nagaland pradesh Congress Committee (NPCC) chuan July 20 khan ram puma exam paper leak leh hna laknaa thil dik lo awm dodalna, 'Chhatron Ki Goonj' campaign chu zirlaite lakah rorelna dik a awm hma chuan chhunzawm zel an tum tih an sawi.

State khawpui, Kohima-a Congress Bhavan-a press conference an neihah, NPCC working president Khriedi Theunuo chuan, sorkar chu ramchhunga zirna leh hna lak chungchanga thil dik humhim loah a puh. Campaign chu chhunzawm zel a nih tur thu leh, party worker-te chuan hemi chungchangah hian awareness kalpui zel a tum tih a sawi bawk. Congress chuan zirna leh exam system-a thil dik lo awmte haichhuah a, dikna pholan an tum tih Theunuo chuan a sawi.

NPCC working president C Apok Jamir pawhin exam paper leak leh, hna lak chungchanga thil dik lo thleng nawn fo chuan ramchhung hmun hrang hranga zirlaite leh chhungkuaah beidawnna a thlen a ni, a ti. Nu leh pa tam takin an fate zirna atan loan an lak bakah, an thil neihte an hralh a, competitive exam hmachhawn turin zirlaiten kum tam tak an inbuatsaih hnuah, an thawhrimnate chuan awmzia a neih loh ṭhin thu a sawi. Congress hruaitu Rahul Gandhi-a chhinchhiah zat tarlangin, Jamir chuan kum 10 liam ta chhung khan exam paper leak 150 chuang a awm a, hei hian zirlai nuai 7.5 vel a nghawng tih sawiin, sorkarin hemi siamṭha tur hian ruahmanna mumal tak a kalpui loh thu a sawi bawk a ni.