Tripura : CM-in smart city project endik

Tripura chief minister Manik Saha chuan July 18 khan state khawpui Agartala-a Smart City Mission project hrang hrang a endik a, official-te chu Durga Puja hmaa kawng siam project-te zo fel hman turin a hriattir. Chief Minister hian project thawhna hmun eng emaw zat tlawhin, hnathawh a endik a ni.

CM Saha chuan state sorkarin sik leh sa avanga chhiatna thleng thei lakah infrastructure thuam chak a ngaih pawimawh thu sawiin, ruahtui tlak tam avanga hnathawh a khawtlai ṭhin avangin, hmasawnna hnathawh zawh felna atan hun tlemte chauh a awm tawh tih a sawi. Ruahtui tlak loh laia hun eng emaw chen hmalak a nih tawh thu leh, September thlaah zawh fel hman a nih loh pawhin, Durga Puja hmaa kawng inkalpawhna siamṭhat chu ngai pawimawh hmasa turin official-te a hriattir.

National Highway dinhmun sawilangin, CM chuan union road transport and highways minister Nitin Gadkari hnenah thlalak leh video a thawn tawh thu leh, a rang lama harsatna an tawhte chinfel sak tura a ngen thu a sawi. Tui luankawr siamṭha turin official-te a ngen a, pipeline structure-te pawh ṭha zawka siam turin a chah bawk.

Chief Minister chuan tun hnai khan Science and Technology Department leh Tripura State Pollution Control Board-te nen meeting an neih thu sawiin, state khawpui Agartala chu plastic awm lohna hmuna siam chungchang an sawi ho tih a tarlang.