Tripura: CM-in online grievance portal 'Yoddha' hawng

Tripura chief minister Manik Saha chuan Nilaini khan North Tripura district-ah online grievance portal 'Yoddha' a hawng a, he portal-ah hian hming ziak lang loin mipuiten complaint hrang hrang an theh lut thei dawn a ni. CM Saha chuan mipui leh sorkar inkara inbiakpawhna ṭha a awm theihna turin North Tripura district thuneituten portal chu an din a ni tih a sawi.

Chief Minister chuan platform chu complaint theh luttute nihna tarlang loa mipuiin harsatna an tawhte an theh luh theihna tur a nih thu a sawi. Portal hi a hlawhtling a nih chuan district tinah dah tum a ni a, mipuiten hlauhthawnna nei loin an harsatnate an thlen thei dawn a ni, a ti. Mukhyamantri Samipeshu programme chu district headquarters-ah kalpui a ni dawn bawk a, he hmalakna hi mipuiten state khawpuia kal ngai loa Chief Minister hnenah direct-a an lungawi lohna an thlen theihna tur a ni.

CM Saha chuan he programme huang zauh a nih chhan sawifiahin, sorkarin state khawpui Agartala-a kar tin grievance hearing neih ṭhina tel tura hmun hla tak tak aṭangin mipuiin an pan a ngaih ṭhin vang a ni, a ti. Mukhyamantri Samipeshu chu edition 70 hlawhtling taka zawh fel a ni tawh a, district-level version chu North Tripura-a buatsaih a nih hmain Dhalai district-ah kalpui a ni tih a sawi.