Nagaland: Japanese Language Centre hawng

Nagaland chuan July 15 khan World Youth Skills Day hmangin, Nagaland Skill and Entrepreneurship Development Mission (NSEDM) hnuaiah Japanese Language Centre hawn nghal a ni. He centre-ah hian Japanese ṭawng ṭhalaite zirtir an ni dawn a, khawvel pum huapa hnathawh theihna hun remchang a siamsak dawn a ni.

Centre hawnnaa thu a sawiah, Higher Education and Technical Education advisor Temjenmenba chuan he programme hi Naga ṭhalaiten Japan leh international market-a hnathawh theihna hun remchang an neih theihna tura duan a nih thu a sawi. Ṭhalaite chu thiamna tihhmasawn leh entre-preneurship uar turin a ngen bawk. Sorkarin thiamna tihhmasawn kawnga a hmalaknate tarlangin, chief minister Neiphiu Rio kaihhruaina hnuaiah hmalakna hrang hrang hmangin hnathawh tur siam kawngah theihtawp chhuah a nih thu a sawi.

Ṭhalai zingah lehkhathiam an pun chhoh zel avangin sorkar hnain a daih loh thu leh, zirlai leh hna zawngtute chu private sector leh entrepreneur lam hawi turin a fuih. Artificial intelligence, machine learning leh technology-driven sector dangte ah thiamna chhawr tlak neih a pawimawh thu a sawi bawk. Department leh stakeholder-te inkara thawh hona ṭha neih a pawimawh thu Temjenmenba chuan a sawi a, thawh hona ṭha a awm chuan thiamna tihhmasawn hmangin khawsak phung chawikan a ni dawn a ni, a ti.