Assam : Cancer care network huang zauh

Assam sorkar chuan cancer enkawlna infrastructure huang zauh tum a nih thu puangin, state pumah Day Care Cancer Center thar 17 din a nih tur thu Legislative Assembly session neih mekah a puang. He hmalakna hi thingtlang leh service tlakchhamna hmuna cancer enkawlna tihchakna tura ruahman a ni.

Cancer laka invenna leh inenkawlna chungchanga MLA Bolin Chetia zawhna chhangin, health minister Ashok Singhal chuan Assam Cancer Care Foundation (ACCF) chuan cancer enkawlna damdawi-in bik leh satellite centre network hmangin state pumah cancer enkawlna service nasa takin huang a zauh tih a sawi.

Minister chuan Guwahati-a State Cancer Institute (SCI) chu cancer enkawlna hmunpui ber ni tura siam a nih thu House a hrilh a; Dibrugarh, Barpeta, Tezpur, Nagaon leh Silchar-a cancer centre panga pawh hman mek a ni tih a sawi. Heng facility kaltlang hian oncology service changtlung, chemotherapy, radiotherapy, surgery leh diagnostic-te kalpui a ni. Cancer enkawlna huang zauhna atan sorkar chuan Day Care Cancer Centre 17 siam belh a ni tih a sawi bawk.

Centre-te hi tunlai technology changkang hmanga thuam an ni a, chemotherapy bakah follow-up treatment nei turin damloten hmun hla tak tak an pan a ngai tawh lo tih Minister chuan a sawi.