Kanto Sabal-a chenna in haltu 3 man an ni: Manipur Home Minister

Manipur home minister Govindas Konthoujam chuan Thawhṭanni khan, Imphal West-a Kanto Sabal-a chenna in rauhsan tawh hal a nih kaihhnawihah mi pathum man an ni tawh tih a sawi. Konthoujam chuan chenna in rauhsan tawhte hal a ni chu na taka a dem thu a sawi bawk.

Helai hmunah hian security ṭhahnem tak dah ni mah se, venhimna lam a chak tawk loh avangin security agency-te chu inralring renga awm tur leh, hetianga pawikhawihna a thlen tawh lohna tur hian thawh hona ṭha nei turin a chah bawk. Konthoujam chuan he pawikhawihna thlen ni hian mi 20 hren an ni a, pathum chu man niin mi dang zawng chhuah leh an ni tih sawiin, he pawikhawihnaa inhnamhnawih dang man turin chhuizuina neih mek a ni, a ti.

Security force zingah CRPF leh state force-te chu helai huam chhungah hian tirh an ni tawh tih a sawi bawk. Hei bakah chief minister Yumnam Khemchand Singh chuan Pathianni khan high-level meeting koin, Kanto Sabal-a security dah belh a nih tur chungchang an sawi ho tih Home Minister chuan a sawi. Naga mi leh sa paruk thah an nih chungchang sawilangin, Konthoujam chuan he pawikhawihnaa inhnamhnawih nia rinhlelh pahnih man an nih tawh bakah, inhnamhnawih dang man tumin chhuizuina neih chhunzawm zel a nih thu a sawi.