Nagaland : IED puak nia rinhlelhah Assam Rifle sipai thi

Nagaland-a Chumoukedima district huam chhunga Improvised Explosive Device (IED) puak nia rinhlelhah, Assam Rifle sipai pakhat a thih bakah, mi pali an hliam. South Asian Terrorism Portal (SATP) tarlan danin, he thil hi kum 2004 hnua a thlen leh vawi khatna a ni tih an sawi.

Defence Public Relations Officer (PRO), Kohima in a tarldan danin, Assam Rifles motor-te beihna atan IED hi tihpuah a ni. Ukhrul police station hnuaia Nungshong Kong khaw bul, Dimapur lam pan Assam Rilfes conovy beihna atan tihpuah niin, motor khalhtu havildar C.M. Chu Singh a thi a, mi dang paliin hliam an tuar bawk.

Police-te chuan he thil hi Dimapur aṭanga km 30 a hla, Sukhovi-a Assam Rifles Training Centre and School bula thleng a nih thu sawiin, Thawhṭanni chawhnu dar 2-3 vela thleng a nih thu an tarlang. Chhuizuina neih mek a nih thu an sawi bawk. Kar liam ta khan Manipur-a Ukhrul district-ah Assam Rifles patrol chu beih an lo ni tawh bawk a, sipai pahnih an thi a ni.

Defence leh security establishment-a thuneitute chuan he pawikhawihna thlengah hian National Socialist Council of Nagaland (NSCN) (Isak-Muivah)-te chu mawhphurtu nia an rinhlelh thu an sawi. NSCN-IM Myanmar-te hi 2015 Framework Agreement chungchanga inrem lohna leh flag bakah inrelbawlna hran siam an phut avangin an pawl hruaitute lakah an hel a ni.

Nagaland chief minister Neiphiu Rio chuan Chumoukedima-a pawikhawihna thleng chu a dem thu leh, he thil hi mi dawihzepte thiltih a nih thu a sawi. Pawikhawihna thlenga mawhphurtute chu man chhuah a, an phu ang hremna pek an nih tur thu a sawi a ni. An state boruak ralmuang tak tichhe zawng a, mipuite tiralṭi zawnga chetna chu an thlen an phal ngai dawn lo tih a sawi.