Sikkim : Mahni intihhlum venna beihpui thlak

Sikkim sorkar chuan Sikkim Inspires hmalakna hnuaiah district hrang hranga frontline healthcare worker-te zirtirna pein, mahni intihhlumna thleng ṭhin venna tichak turin state pumah hmalakna a kalpui. State health and family welfare department chuan rilru lama harsatna nei a rang lama hriat chhuah, a hun taka hmalak leh mental healthcare tihchangtlun a pawimawh thu sawiin, thingtlang leh service ṭhat tawk lohna hmunahte ngaih pawimawh zual a ṭul thu a tarlang.

Mid-level health provider (MLHP), auxiliary nurse midwife (ANM), health educator leh accredited social health activist (ASHA) te chu mahni intihhlum hlauhthawnawma awmte hriatchhuahna tur, basic risk assessment buatsaiha puihbawmna pe nghal tura zirtir an ni.

District mental health programme (DMHP) chuan July 7-10 khan ni thum chhung training programme an buatsaih a, session hrang hrangah hian MLHP, ANM leh health educator te an tel. Hei bakah ASHA hnathawk 190 te chuan one-day training program an nei bawk a, mahni intihhlum tum hlauhthawnawma awmte a rang lama hriatchhuah leh, rilru lama harsatna tawkten enkawlna an dawn theihna tur chungchang sawi hona an nei.

Sikkim hi mipui awm zat aṭanga chhuta India rama mahni intihlum tamna ber state niin, National Crime Record Bureau (NCRB) 2022-a a lan danin, mahni intihlum rate hi 43.1% a ni. Kum 2023 khan sorkar hmalakna hrang hrang avangin 40.2% ah tlahniamin, kum 2024-ah 36.3% ah a tlahniam leh bawk.