Manipur : FNCC-in COTU puhna an hnawl

Manipur-a Foothills Naga Coordination Committee (FNCC) chuan Chingmang Leimakhong-a Meitei leh Naga-te chenna in hal a nih chungchanga Committee on Tribal Unity (COTU)-in a puhna chu a hnawl a, Kuki-Zo pawl chu thudik lo thehdarh leh mipui rilru sukthlek thlak danglam tumah an puh.

FNCC-in July 12-a thuchhuah an siamah, COTU-in an puhna chu thu belhchian dawl lo leh phuahchawp a ni tih tarlangin, Manipur-a hnam leh hnam inkara buaina a chhuah aṭangin he pawl hian thu dik lo an thehdarh fo niin an sawi. Naga pawl chuan July 11-a chenna in hal a nih chungchanga Naga community an puhna chu mawhphurhtu tihdanglam tumna a nih thu an sawi. Chingmang Leimakhong-a Meitei leh Naga-te chenna in chu Kuki raltlante hal a ni tih tarlangin, video evidence rintlak, mit ngeia hmutute thusawi leh evidence dang pawh an neih thu an sawi.

Committee chuan Kuki civil society organisation-ten thuchhuah an siama thu inmil lo nia a sawite a sawisel bawk. Naga mi paruk thah an nih chungchanga thil thleng sawilangin, FNCC chuan Kuki hruaitu pakhatin camera-ah he inthahna hi thinrim avanga thleng a nih thu a sawi niin an puh a, a tukah he a thuchhuah hi a hnukkir ​​leh a ni. FNCC chuan hetianga thuchhuah siam hian Kuki pawl an rinngamna a tihchhiat thu leh, chhui chianna neih a ṭul thu an sawi. An pawl chuan state sorkar leh chhuizuina neitu agency-te chu thu belhchian dawl lo awih lo tur leh, dan anga hma la turin an ngen bawk.