Nagaland: Governor-in ṭhalaite entrepreneurship uar turin ngen

Nagaland governor, Nand Kishore Yadav chuan Pathianni khan ṭhalaite chu thil thar hmuh chhuah leh kutkawih eizawnna (entrepreneurship) uar turin a ngen a, an mawhphurhnate hlen chhuak a, state hmasawnna tura inlungrualna leh thawh hona ṭha nei turin a chah bawk.

Dimapur Town Hall-a Linguistic Minority Forum of Nagaland (LMFN)-in a buatsaih, Youth Conclave-cum-Cultural Fest-a thu a sawiah, Governor chuan ṭhalaite chu state heritage chhawm nung tur leh hma hun atana architect pawimawh an nih thu a sawi.

Yadav chuan ṭhalaite chu thil hriatzauna, thiamna leh entrepreneur lama tuina nei turin a chah a, hun remchang zawng mai loa mahnia hmalak tumna nei turin a fuih bawk. In khawngaih tawnna, thil thar hmuh chhuah leh mitin inzahtawnna leh mipui thawh hona hmangin state in hma a sawn dawn tih a sawi. Yadav chuan conclave buatsaihtute chungah lawmthu sawiin, state hnam ziarang, ṭawng leh khawsak hona chhawm nung turin mipui ṭanrual a pawimawh thu a sawi a ni.

Nagaland-a Linguistic Minority Forum-in state chhunga cheng Naga ni lo community hrang hrangte an inzawmkhawm avangin lawmthu a sawi a; state economy, zirna leh khawtlang inremna atana an thawhhlawkzia a sawilang bawk. Hetianga inpumkhatna hian remna leh muanna bakah khawsak hona an tichak tih a sawi. Youth Conclave-cum-Cultural Fest chuan inṭhianṭhatna, ngaihtuahna thar leh ṭhalaite khawtlang tana theihtawp an chhuah theihna atan a ṭangkai thu a sawi.