Assam : JICA water supply project kuminah zo fel dawn

Assam sorkar chuan nimin July 9 khan state assembly-ah, kum 2012 aṭanga thawh ṭan, Japan International Cooperation Agency (JICA) drinking water supply project la zawh loh chu kumin December thla chhunga peihfel a ni dawn tih a sawi.

MLA Rekibuddin Ahmed zawhna chhangin, housing and urban affairs minister Kaushik Rai chuan South-Central Guwahati Water Supply Project chu 96.75 % thawh zawh a nih tawh thu leh, project hi thawh zawh thuai a ni dawn tih a sawi.

Minister chuan JICA sum hmanga project pahnih thawhnaah hian Rs vbc 1,450.87 sen a ni a, chung zingah chuan JICA loan Rs vbc 1,425.93 leh State-Owned Priority Development (SOPD) fund an tel tih a sawi. JICA loan chu kum 2024 December thla khan lak a ni a, hnathawh zawh loh la awm chu kumin December thlaah zawhfel a ni dawn a ni, a ti.

Sorkar chuan South-Central project hian chenna in 83,569 ah tui supply a pe thei dawn a, North Guwahati project chuan chenna in 15,000 velah tui supply a pe dawn niin a tarlang.