Arunachal : Minister-in thingtlang kawng project chak zawka kalpui turin hriattir

Arunachal Pradesh rural works minister, Passang Dorjee Sona chuan July 8 khan Pradhan Mantri Gram Sadak Yojana (PMGSY) leh Vibrant Villages Programme hnuaia kawng siam project hrang hrangte chu rang zawka thawk turin official-te a hriattir a, a hun taka zawh fel leh quality ṭha a ngaih pawimawh thu a sawi.

Minister chuan he thupek hi district hrang hranga thingtlang kawng project thawh mek a endiknaah a tichhuak a ni. Meeting-an neihah, Sona chuan project tin hmasawnna a enfiah a, harsatna awmte sawi ho a nih bakah hnathawh tihkhawtlai awmte rang zawka thawk chhunzawm tur leh, hun tiam chhunga zo fel turin official-te a hrilh bawk.

Sona chuan field engineer-te leh, project thawktu agency-te chu project ṭha taka kalpui a nih theihna atan thawh hona ṭha nei turin a chah. Thingtlang inkalpawhna chu sorkarin a ngai pawimawh tih tarlangin, kawng ṭha chu zirna, hriselna, market leh service pawimawh atan a ṭangkai tih a sawi.

Sorkar laipui hnuaia Vibrant Villages Programme chu infrastructure thuam chakna atan leh, thingtlang bakah ramria chengte khawsak chawikanna tur a nih thu Minister chuan a sawi bawk a ni.