Meghalaya : CM-in FCRA chungchangah Amit Shah hmu

Meghalaya chief minister Conrad K Sangma leh Kristian hruaitute chuan Pathianni khan New Delhi-ah union home minister Amit Shah hmuin, Foreign Contribution (Regulation) Act (FCRA) siamṭha tura rawtna chungchangah an lungawi loh thu an thlen. He thil hian Meghalaya, Kristian 75% vel awmna chu a nghawng thei dawn tih an sawi an ni.

Palaite chuan Section 16A(5), FCRA siamṭhatna tura ruahmanah chuan pawl pakhat registration tihtawp emaw renew loh emaw a nih chuan ramdang aṭanga puihbawmna an dawn hmanga an thil neih; building, sikul, damdawi-in leh ramte chu laksak emaw, hralh theihna tura thuneihna pekna a ni tih an sawi. Chief Minister chuan he dan thlak danglam tumna hian zirna, hriselna leh khawtlang hmasawnna kawnga sorkar hmalaknate tihlawhtlingtu sakhua, zirna, leh midangte tana thil ṭha tihna hmuna hnathawh a tihbuai theih dante a sawi. Meghalaya dinhmun ngaihchan a ṭul thu leh, public service hmanga institution-ten buaina tawk loa hna an thawh chhunzawm theihna tura hmalak a ngai a ni, a ti. Sorkar laipui chu dan tihdanglamna tura ruahmanna siam a nih rualin heng pawlte thawhhlawkzia hriatpui chunga hma la turin a ngen.

Kohhran pawlte chuan ramdang sum hmanga sak building, sikul, damdawi-in, ram leh thil dangte laksak an nih chuan Meghalaya thingtlang hmun hla leh tlawhpawh harsaa chengte leh hmarchhak state dang, sorkar infrastructure awm tam lohna hmuna mipui, a bikin zirlai leh damlote a nghawng thei tih an sawi bawk.