Arunachal : Anti-drug marathon-ah mi 600 chuang tel

Arunachal Pradesh khawpui Itanagar-a Capital Police-in nimin June 26, International Day Against Drug Abuse puala 5 km marathon an buatsaihah mi 600 chuang an tel a, ruihhlo hman sual kawnga awareness bakah, khawsak phung hrisel neih theihna tura buatsaih a ni.

He marathon hi IG Park-ah neih niin; zirlai, ṭhalai, fitness lama tuimite leh Itanagar bakah, state chhung hmun hrang hrang aṭangin an tel a ni. Police deputy superintendent, Chamrak Arun chuan marathon-a telte chungah lawmthu sawiin, International Day chu ruihhlo hman sual leh zawrh tihtawpna tur a ni tih a tarlang. He huna khuallian, professional leh physique athlete Hillang Yajik chuan ṭhalaite chu fitness ngai pawimawh tur leh ruihhlo laka inthiarfihlim turin a chah.

Police superintendent Jummar Basar chuan ruihhlo hman sual chu khawvel pumah a hluar hle thu leh, nun suattu a nih thu a sawi. Ruihhlo hman sual chuan mimal, chhungkua leh vantlang nunah nghawng pawi tak a neih thu leh, he thil nuaibo tur chuan public awareness leh thawh hona ṭha a pawimawh tih a tarlang. Ṭhalaite chu khawsak phung hrisel nei a, ruihhlo hman sual hlauhawmzia inzirtirna kalpui chhunzawm zel turin a ngen bawk. Basar chuan Capital Police-ten ruihhlo do kawnga an hmalaknate fakin; volunteer, participant-te leh tualchhunga he hmalakna thlawptu PACE TRIBE chungah lawmthu a sawi bawk.