Meghalaya : FIFA World Cup atan Shillong fan park hawng

Meghalaya sorkar chuan nimin, June 26 khan Shillong-ah Chief Minister's Football Fan-Park a hawng a, football ngainatute tan FIFA World Cup 2026 neih meka match thlan bikte chu screen-ah a thlawna mipui en theiha pek chhuah a ni ang.

Fan park hi Polo-a S.R.G.T. Parking Lot-ah siam a ni a, match ṭhenkhat chu screening neih a ni dawn a, nizan aṭang khan zan dar 9:30, dar 10:30 leh zing dar 12.30-a inkhelte en theih a ni ang. Hei hi football lama tuimiten tawnhriat thar an neih theihna tur leh, state-a football culture ṭhang mek chawikanna atana ruahman a ni.

He fan park-ah hian Chief Minister's Meghalaya Grassroots Music Programme-a artist-te chu inkhel en tur awm apiangin an perform bawk ang. Tournament neih chhungin tualchhung mite leh state tlawhtute tan helai hmunah hian a thlawnin a luh theih dawn a ni. Sorkar chuan he hmalakna hi infiamna chawikanna leh, sport ecosystem tihchakna tur a nih thu an sawi.

State sorkar chuan tun hnai kum eng emaw zat aṭang khan Meghalaya chu India rama infiamna hmun pawimawh berte zinga pakhat a nih theih nan infiamna hmunhma leh talent thar zawn chhuah hnaah hma a la nasa hle. Chief Minister’s Football Fan-Park pawh hi infiamna, hnam zia leh mipui inkawmhlimna hmun nuam leh hlimawm tak siam tumnaa hmalakna zau zawk zinga pakhat a ni tih official-te chuan an sawi a ni. He project hi Mawkhanu-a ramchhunga football stadium lian ber sa tura sorkarin hma a lakna nen a inzawm bawk.