Meghalaya : CM-in energy supply leh rooftop solar plan endik

Meghalaya chief minister Conrad K Sangma chuan Thawhlehni khan MePDCL Distribution Franchisee arrangement hnuaia SAI Computers-in a enkawl huam chhunga power supply, bill chungchang leh consumer-te lungawi lohna leh harsatna tawhte a endik.

Consumer-te tana rintlak service pek chu sorkar ngaih pawimawh ber a nih tur thu leh, hnathawhna kawnga harsatna awm karah mipuite tan power supply rintlak, bill dik taka siam leh service mumal taka kalpui a ṭul tih a sawi. Sangma chuan MePDCL leh franchisee-te chu infrastructure tihchangtlun kawnga chak zawka hma la tur leh, meter leh transformer chhia thlak bakah, mipui hman ṭangkai theih tura service kalpui a, lungawi lohna leh harsatna awmte rang taka chingfel turin a hriattir bawk.

Chief Minister chuan PM Surya Ghar Scheme kalpui dan pawh endikin, state puma rooftop solar hman uar a pawimawh thu a sawi. Chhungkaw tin tana ni zung chakna hmanga energy siam chhuah hman leh man tlawm zawk a nihnate hrilh hre turin awareness neih a pawimawh thu a sawi a, sorkar institution leh khawtlanga renewable energy hman uar a nih theih dan turte a zirchiang a ni. Sorkarin a ngaih pawimawh ber chu renewable energy ngelnghet siam tura hmalak niin, hei hian energy security a tichak dawn a, mipui tan hun rei tak chhung hamṭhatna a thlen a beisei thu a sawi a ni.